Poslovne vijesti - Makedonija

„Kемет електроникс“ двојно ќе го зголеми бројот на вработени во Македонија

Американската компанија „Kемет електроникс“ која лани отвори фабрика во технолошката зона „Бунарџик“ досега вработува 190 лица, а плановите на менаџерите на оваа компанија се во иднина двојно да ја зголеми оваа бројка.

- Ние треба да растеме како компанија и да го подигнеме нашето ниво на вештини кое ќе ни овозможи да инвестираме во различни производствени процеси. Денес ние го развиваме идното раководство на нашата македонска компанија и успешноста ќе ни овозможи двојно да го зголемиме производството и бројот на вработени во блиска иднина - вели Гвидо Галени во интервју за „Лидер“, одговарајќи на прашањето кои се идните планови на компанијата за фабриката во Македонија.

Галени во интервјуто истакнува дека досега се задоволни од бизнис-климата во земјава, но додава дека се соочиле со мали проблеми кои сепак успеале да ги решат.

-Јас с` уште сметам дека сме на почетокот и ова е момент на предизвик. Имавме некои мали проблеми кои веќе се решени во партнерство со раководството на Дирекцијата за ТИРЗ. Во однос на бизнис-климата, ние извезуваме 100 отсто од нашите производи и на тој начин бизнис-климата во земјата и локалната економија не влијаат толку врз нас. Но морам да кажам дека сме задоволни од општите услови за водење бизнис - вели Галени.

„Kемет електроникс“ произведува електронски уреди пред с` наменети за брендовите „Филипс“ и „Сименс“. Целокупното производство од македонската фабрика е наменето за извоз.